النهاردة كان في خبر مهم جدا من لاهالينا من كبار السن والخبر ده جاي من الهيئة القومية للتأمينات والمعاشات واللي هتطبق زيادة جديدة في الحدين الادني والاقصي  للمعاشات.. ياتري الزيادة دي هتوصل لكام وامتي موعد تطبيقها

منظومة التأمينات والمعاشات واحدة من أهم الخدمات الحكومية اللي بتقدمها الحكومة للعاملين في القطاعين العام والخاص، خصوصا انها بتقدم راتب شهري للمؤمن عليهم لما يخرجوا علي سن المعاش، والسن ده كل واحد فينا بيكون محتاج اي قرش يصرف منه علي نفسه وعلي علاجه وبيته، خصوصا أن بنكون وصلنا لسن مش هنقدر نجري ونعافر فيه زي الأول ولا نقدر نحارب علي لقمة العيش زي ما بنعمل دلوقتي .

وخلينا نكون متفقين أن المعاش دلوقتي هو العصب الحقيقي لكل اسرة مصرية، وكل واحد الزمن دار بيه سنين طويلة في دهاليز الشغل سواء كان قطاع عام أو خاص، والدولة علي مدار الفترة اللي فاتت اثبتت وبالدليل القاطع أنها في صف المواطن وبتدعم كبار السن واصحاب المعاشات، وفعلا في نص تشريعي بينص علي وجود زيادة سنوية في المعاشات وفقًا لقانون التأمينات والمعاشات، خصوصا أن المادة 35 من قانون المعاشات، بتنص علي تطبيق زيادة المعاش المستحق للمواطن في 30 يونيو من كل سنة ميلاديةن وبيكون الصرف بداية من أول يوليو، وبتكون نسبة الزيادة بحد أقصى 15%، وصندوق التأمينات الاجتماعية بيتحمل نسبة زيادة جزء من المعاشات والخزانة العامة للدولة بتتحمل الجزء الباقي .

طيب اية الخبر الحلو اللي الدولة بتجهزة لأصحاب المعاشات والتأمينات ؟.

النهاردة اللواء جمال عوض رئيس مجلس إدارة الهيئة القومية للتأمين الاجتماعي، أعلن عن رفع الحد الأدنى لأجر الاشتراك التأميني إلى 2300 جنيه بدلًا من 2000، والحد الأقصى إلى 14500 جنيه بدلا من 12600 ألف جنيه، وهيتم التطبيق من أول يناير اللي جاي.

اللواء جمال عوض، رئيس مجلس إدارة الهيئة القومية للتأمين الاجتماعي، قال أن الزيادة الجديدة هترفع الحد الأدنى للمعاش علشان يوصل لـ 1495 جنيه بدل من 1300 جنيه، وهيرتفع معاها الحد الأقصى للمعاش إلى 11600 جنيه بدل من 10080 جنيه، وده خاص بالعاملين اللي متأمن عليهم واللي هتنتهي خدمتهم بداية العام اللي جاي .

رئيس الهيئة القومية للتأمين الاجتماعي، كمل كلامه وقال أن القرار ماشي في أطار احكام قانون التأمينات الاجتماعية والمعاشات الصادر واللي بينص على تطبيق زيادة سنوية للحدين الأدنى والأقصى لأجر الاشتراك التأميني، وأن الزيادة الجديدة بتستهدف تحسين قيمة المعاشات اللي ييتحصل عليها المؤمن عليهم وقت انتهاء خدمتهم .