مصر حاليا عندها سيل كبير من كبري الشركات العالمية اللي عايزة تدخل تنفذ مشروعات في مجال الطاقة النظيفة والطاقة الجديدة والمتجددة.. ياتري اية السر في كم الشركات دي اللي عايزة تدخل تنفذ استثمارات في مجالات الطاقة الجديدة.. ومصر بتستهدف الوصول بانتاج الطاقات المتجددة لكام ميجاوات وات في السنين اللي جاية
 

مصر في الفترة دي انتهت من اعداد استراتيجية الطاقة المتجددة 2040، واللي بتستهدف الوصول بنسبة الطاقات المتجددة علي الشبكة الموحدة للكهرباء الي 40% بحلول 2030، والوصول بحجم الطاقات المتجددة لـ60% بحلول 2040، خصوصا أن زيادة الطاقات الجديدة هتوفر لمصر مليارات كتيرة من الدولارات الحكومة بتصرفهم في استيراد وتوريد الوقود الحيوي اللي بتستخدمه مصر علشان تشغل محطات توليد الكهرباء سواء كانت من الغاز الطبيعي أو المازوت أو الحاجات التانية اللي بتستخدم في تشغيل المحركات .

طيب اية سر زيادة عقود انتاج الكهرباء من الطاقات الجديدة والمتجددة اللي وقعتها مصر في الشهور اللي فاتت؟.

في الفترة اللي فاتت، مصر وقعت كم كبير من عقود الشركات الأجنبية لتنفيذ مشروعات طاقة جديدة ومتجددة من الشمس والرياح خصوصا أن العقود اللي وقعتها مصر بتنص علي قيام وزارة الكهرباء والطاقة المتجددة بشراء الكهرباء اللي هتنتجها الشركات دي من محطات الطاقة الشمسية وطاقة الرياح جزء كبير هيكون منها بالدولار .

عقود توريد الكهرباء اللي وقعتها مصر بتنص كمان علي قيام الشركة المصرية لنقل الكهرباء بشراء إنتاج الشركات الأجنبية علي طول فترة عمر المحطات، واللي بتفضل شغالة لمدة 20 سنة بالنسبة للطاقة الشمسية و25 سنة لطاقة الرياح.

عقود توريد وشراء الكهرباء بتنص كمان أنها هتكون مسؤولة عن توفير الجزء الدولاري لمشروعات الطاقة المتجددة  للشركات الأجنبية، والشركة المصرية لنقل الكهرباء هترسل فواتير الاستهلاك والمبلغ المطلوب توفيره بالعملة الأجنبية للبنك المركزي المصري واللي هيتشغل علي توفيره وسداده للشركات.

طيب ليه مصر هتدفع جزء من مستحقات الشركات الاجنبية بالدولار؟.

ببساطة الدولة هتدفع جزء كبير من مستحقات الشركات الاجنبية اللي بتنفذ مشروعات الطاقة الجديدة والمتجددة بالدولار بسبب أن الشركات دي بتشتري كل المهمات والمكونات الخاصة بالمشروعات بالعملة الأجنبية وجزء بسيط جدا بيكون من المهمات والحاجات اللي بتدخل في تصنيع وبناء المحطات بيكون من المنتجات الملحية، علشان كده الحكومة بتحاول تعوض نسبة من الارقام اللي هتدفعها الشركات الأجنبية من الدولار.

السبب الرئيسي في المشروعات الجديدة هيا مشروعات الربط الكهربائي اللي مصر بتوقعها حاليا مع الدول الخارجية زي مشروع الربط الكهربائي المصري السعودي، ومشروع الربط الكهربائي مع السودان وليبيا، ده غير مشروعات الربط الكهربائي مع اليونان وقبرص خصوصا أن الحكومة عندها خطة لتحويل مصر لمركز اقليمي لتبادل الطاقة بين قارات العالم الثلاثة أفريقيا وأسيا وأوروبا، وهتكون مصر هيا حلقة الوصول بين شبكة الربط الكهربائي بين دول العالم.