أكيد مرت عليك اللحظة اللى اكتشفت فيها ان بطاقة الـATM بتاعتك ضاعت أو اتسرقت صح؟ بتفكر ساعتها الفلوس اللي في الحساب أمان؟ هعمل إيه عشان أستخرج بدل فاقد؟ ومين هيساعدني في أسرع وقت؟..  متقلقش في الفيديو ده هنقولك على كل الخطوات بالتفصيل وأضمنلك إنك بعد ما تسمعه مش بس هتبقى مطمن ده كمان هتبقى جاهز لأي موقف زي ده في المستقبل

لو حصل وفقدت بطاقة الـATM بتاعتك سواء ضاعت.. اتسرقت.. أو حتى اتلفت.. أول حاجة لازم تعملها فورًا هي إيقاف البطاقة علشان تحمي حسابك وتضمن إن محدش يستخدمها في أي عملية غير قانونية

حد ممكن يسأل  أوقف البطاقة إزاي؟

معظم البنوك المصرية دلوقتي بتوفر خدمة وقف البطاقة بشكل سريع ومباشر عن طريق تطبيق الموبايل أو الإنترنت البنكي.. لو ما عندكش تطبيق البنك ممكن تتصل بخدمة العملاء الخاصة بالبنك بتاعك وده بيتم على مدار ال 7 ايام طوال ال 24 ساعة  الرقم بيكون مكتوب على ظهر البطاقة أو تقدر تلاقيه بسهولة على موقع البنك.. المهم متأخرش كل دقيقة بتفرق وممكن تقلل فيها فرص أي استخدام غير قانوني للبطاقة

دلوقتي ندخل على الخطوة التانية إزاي تستخرج بدل فاقد؟

لازم تروح أقرب فرع للبنك اللي عامل فيه حسابك ولو عندك شك في المكان افتح خرائط جوجل واكتب اسم البنك وأقرب فرع ليك وأغلب الفروع بتشتغل من الساعة 8 أو 8:30 الصبح لحد 3 العصر فاختار وقت مناسب.. وخد معاك إثبات هويتك وبطاقة الرقم القومي لازم تكون سارية لأنك مش هتقدر تعمل أي إجراء بدونها.. وممكن يطلبوا منك إثبات إضافي زي صورة من آخر معاملة عملتها أو أي مستندات تانية بتأكد إنك صاحب الحساب.. وبمجرد ما توصل هيدّوك استمارة طلب استخراج بدل فاقد هتكتب فيها بياناتك الأساسية زي رقم الحساب اسمك بالكامل وأحيانًا تاريخ آخر معاملة عملتها وأغلب البنوك بتاخد رسوم بسيطة على الخدمة دي، وبتتراوح ما بين 50 لـ 150 جنيه حسب البنك

“طب البطاقة الجديدة هتاخد وقت قد إيه؟

أغلب البنوك بتسلم بطاقة البدل الفاقد خلال 3 لـ 7 أيام عمل وبعض البنوك كمان بقت تقدم خدمة الاستلام الفوري من الفرع أو حتى التوصيل لحد البيت مقابل رسوم إضافية

المهم أول ما تستلم البطاقة الجديدة لازم تغير الرقم السري فورًا، وده غالبًا بيكون من أقرب ماكينة ATM وخليك متابع لحسابك بشكل دوري من خلال تطبيق الموبايل أو رسائل الإشعارات اللي البنك بيبعتها.. ولو كنت من النوع اللي بينسى كتير ممكن تفكر في استخدام محفظة إلكترونية زي "ميزة" أو أي خدمات دفع مباشر من غير ما تضطر تعتمد بالكامل على البطاقة

اجمالا  موضوع استخراج بدل فاقد لبطاقة ATM في 2025 بقى أسهل كتير مما تتخيل خاصة مع تطور خدمات البنوك في مصر.. المهم إنك تكون سريع في التصرف وتتابع حسابك دايمًا علشان تحافظ على فلوسك وعلى وقتك