لو معاك فلوس وعايز تستثمرها يا ترى تختار إيه دهب ولا فضة.. وايه فيهم الأفضل من حيث الحفاظ على قيمة الفلوس وتحقيق ارباح؟ وايه هي المخاطر اللي ممكن تقابلك لو حطيت فلوسك هنا أو هناك؟.. في التقرير  ده  هنقولك كل التفاصيل  فتابعنا للآخر
 

كتير من المواطنين من أصحاب المدخرات أو اللي معاهم تحويشة بيدوروا عن الوسائل الأفضل لتحقيق أعلى ربحية ممكنة من فلوسهم سواء كانت صغيرة أو كبيرة، عشان كده أول حاجة بتيجي قدامهم هي الدهب، ولكن في الشهور الأخيرة ظهر معدن الفضة كحصان رابح في سوق الاستثمار وكتير من المستثمرين بقوا بيضخوا فلوسهم فيه.. طب يا ترى أيهما أفضل، الدهب ولا الفضة.

نقدر نقول، إن الاتنين وسيلة آمنة لأصحاب فلوسك خاصة للناس أصحاب المدخرات الصغيرة، أو اللي معاهم تحويشة على قد الإيد، ولكن كتير من الخبراء بيقولوا، إن الاستثمار في الدهب أفضل من الفضة في حالات وشروط معينة.

ولكن الأهم هي سؤال تاني لازم يجيب عليه الشخص بنفسه، وهو إيه هي أهدافه الاستثمارية؟

كتير من الخبراء بيفضلوا الاستثمار في الدهب أفضل من الفضة وده في حالة لما يكون هدفك استثمار طويل الأجل، لأن كل ما يكون في أزمات كل لما يعلى نجم الدهب لانه الملاذ الأكثر أمانا، وفي الحالة دي، فلازم حضرتك تشتري الدهب وتدخره لأطول وقت ممكن، خاصة إن الفترة دي بتشهد تقلبات اقتصادية كتيرة، وكمان لأن الدهب بيحقق لك أفضل ربح في النهاية، عشان كده بيكون أنسب استثمار في الحالة دي

الاستثمار في الدهب كمان مش أفضل من الفضة إذا كان صاحب المدخرات بيبحث عن أعلى عائد خلال فترة قصيرة وده لأن للفضة معدن نفيس لكن بيكثر المضاربة عليه وبيشتهر بأنه أعلى مخاطرة مقارنة بالدهب، وده معناه إن الفضة استثمار أفضل لأي شخص قادر على تحمل التقلبات التي ممكن تشهدها الأسواق على طول، وهنا بيكون الاستثمار في الفضة أفضل كحالة استثنائية.

ونرجع نقول تاني إن الدهب هو أحد أهم طرق الاستثمار وحفظ قيمة المال عالميا ومحليا، خاصة وأنه بيحقق مكاسب كتيرة على مر السنين، والفترة اللي فاتت كانت شاهدة على الكلام ده خاصة في ظل الأحداث والتوترات الاقتصادية والجيوسياسية، اللي أدت إلى زيادة الإقبال على شراء الذهب باعتب الملاذ الآمن .

وعشان كده مؤسسة جولد إيرا العاملة في مجال أبحاث وتقارير الذهب في الأسواق العالمية والمحلية قالت في تقرير ليها إن في عدد من المعلومات والخطوات اللي لازم حضرتك تحطها في اعتبارك قبل الاستثمار في الدهب عشات تحقق أكبر فايدة، واللي أولها ضرورة التنوع في المحفظة الاستثمارية، يعني ماتحطش جزء كبير من فلوسك في نوع واحد من الاستثمار وهو الدهب مثلا ، لأنه ممكن جدا يتعرض لخسارة كبيرة وبالتالي حضرتك تخسر جزء كبير من فلوسك، فلازم حضرتك تقلل المخاطرة من خلال الاستثمار في أنواع مختلفة من المجالات، زي شراء الأسهم، وسبائك الدهب والعملات الذهبية والعقود الآجلة وغيرها.