يا ترى إيه حكاية الدولار في مصر؟ وهل لسه فيه أزمة زي ما ناس بتقول؟ وإزاي البنوك المصرية بقت بتوفر الدولار بسهولة؟ وهل فعلاً الاستيراد مابقاش معطّل زي الأول؟ كل دي أسئلة بتدور في دماغ ناس كتير اليومين دول، والنهاردة هنفهم الحكاية كاملة  عشان الصورة تبقى واضحة ومحدش يضحك عليك

خلينا نقولها بصراحة، الدولار كان مشكلة في وقت من الأوقات، خصوصًا لما العالم كله كان بيعدّي بفترة ركود اقتصادي، والحرب بين روسيا وأوكرانيا عملت قلق كبير في أسواق العملات لكن النهارده الوضع اختلف تمامًا في مصر.. والبنوك المصرية حاليًا بتوفر الدولار لكل اللي محتاجينه، سواء للأفراد أو للشركات. والأهم، إن حتى بعد ما تم رفع القيود اللي كانت موجودة زمان - اللي كانت بتمنع البنوك إنها تموّل استيراد السلع غير الأساسية - الدنيا ماشية زي الفل.

طب، إيه اللي حصل؟
اللي حصل إن الحكومة  والبنك المركزي تحديدًا، خدوا خطوات ذكية جدًا لضمان توافر الدولار في السوق. أول حاجة، ركزوا على إنهم يحافظوا على استقرار الجنيه، وده حصل عن طريق إنهم نظموا حركة الاستيراد والتصدير. يعني، الأولوية بقت للسلع الضرورية، زي الأكل والأدوية، وبعد كده بدأوا يوسّعوا النطاق عشان يشمل السلع الترفيهية وغير الأساسية.

وده كمان اتزامن مع حاجتين مهمين اولهم زيادة تدفقات الدولار من مصادر مختلفة زي السياحة اللى رجعت بقوة، والحمد لله ومصر بقت وجهة سياحية عالمية وكمان تحويلات المصريين في الخارج، اللي بتدخل مليارات الدولارات مستمرة وبتزيد.

وتاني حاجة  السيطرة على السوق السودا اللي كانت بتخلق نوع من الفوضى في أسعار الدولار ودلوقتي اختفت تماما  لأن البنوك بقت المصدر الرئيسي اللي بيغطي احتياجات السوق.

طب هل فيه صعوبات لسه؟
أكيد، مافيش اقتصاد في العالم مابيعديش بصعوبات. لكن لو بصينا على الوضع دلوقتي مقارنة بالسنة اللي فاتت، هنلاقي إن فيه تحسن ملحوظ و البنوك بقت أسرع في تلبية الطلب على الدولار، والأهم إن أسعار الاستيراد بقت أقل اضطرابًا

فلو لسه حد عنده شك يقدر بنفسه يتوجه لأي بنك مصري ويسأل عن توافر الدولار الأمور رجعت للطبيعة والبنوك المصرية أثبتت إنها على قدر التحدي.

الرسالة اللي عايزين نوصلها واضحة وبسيطة.. مفيش أزمة دولار في مصر دلوقتي.. والبنوك بتوفّر العملة الأجنبية بشكل سلس والدولة ماشية بخطة متزنة لضمان استقرار السوق.. عشان كده ماتصدقش أي كلام بيتقال على السوشيال ميديا من غير دليل واضح

بكده نكون وصلنا للنهاية بتاعتنا، لو عندكم أي استفسارات أو أسئلة عن الموضوع، ما تترددوش تبعتولنا. واستنونا في حلقة جديدة بمعلومات أكتر وأجوبة على كل تساؤلاتكم