هي أسعار كروت الشحن وباقات النت هتغلى قريب، ولا دي شائعات على السوشيال ميديا، وإيه سر التصريح المثير للجدل للرئيس التنفيذي للجهاز القومي لتنظيم الاتصالات بخصوص الموضوع ده، والأيام الجاية هيحصل فيها إيه.. هنقولك كل التفاصيل فتابعنا للآخر.

أسعار كروت الشحن وباقات النت بقت جزء  أساسي من اهتمام ملايين المصريين، وده لأن ببساطة مانقدرش نعيش من غير الانترنت، عشان كده انتشر كلام كتير على مواقع التواصل الاجتماعي خلال الأيام الأخيرة، عن وجود زيادات جديدة في أسعار خدمات الاتصالات.

من هنا، رد محمد شمروخ، الرئيس التنفيذي للجهاز القومي لتنظيم الاتصالات، على الكلام المتداول ده، وقال إن أي تعديلات هتحصل على أسعار خدمات الاتصالات هتيجي نتيجة دراسات دقيقة، وقال كمان إن في موافقة مبدئية لمراجعة أسعار خدمات المحمول والاتصالات، لكن لم يتم حتى الآن الموافقة النهائية على زيادة الأسعار زي ما اتردد على مواقع التواصل الاجتماعي.

ولو رصدنا الزيادات اللي تمت من سنة 2020، فنقدر نقول، إن متوسط نسبة الزيادة بلغت 15% خلال السنين الأربعة الأخيرة، وأنه تم رفع الأسعار 4 مرات متتالية بمعدل مرة واحدة في السنة.

وكانت سنة 2023 و2024، شهدت نسبة زيادة حوالي 15%، في حين بلغت نسبة الزيادة خلال عام 2022 10%، واحتل عام 2020 المركز الأخير بنسبة زيادة قدرها 5%.

عشان كده، اتكلم الرئيس التنفيذي للجهاز القومي لتنظيم الاتصالات، وقال إن سبب الموافقة المبدئية، هو ارتفاع تكاليف التشغيل اللي بتواجه شركات المحمول، وأن الجهاز القومي دلوقتي بيدرس التوقيت الأنسب لتطبيق هذه الزيادة في أسعار كروت الشحن وخدمات المحمول.

ووفقا للأرقام، ارتفع عدد المشتركين للهاتف المحمول إلى 109.04 مليون مشترك بنهاية إبريل 2024 مقارنة بـ 108.6 مليون بنهاية مارس 2024، و102.90 مليون مشترك بنهاية إبريل 2023، وبنهاية عام 2022 بلغ عدد المشتركين 102 مليون، مقارنة بـ 101 مليون خلال عام 2021، في حين أن عدد المشتركين خلال سنة 2020 لم يتجاوز 96 مليون، وفق بيانات وزارة الاتصالات وتكنولوجيا المعلومات.

وسجل عدد مشتركي الهاتف المحمول نسبة 90% من إجمالي مشتركي الخدمة الهاتفية في أبريل- يونيو 2024، في حين زاد معدل نمو قطاع الاتصالات وتكنولوجيا المعلومات نحو 16.3% في العام المالى 2022/2023؛ ليصبح القطاع هو الأعلى نموا بين قطاعات الدولة على مدار 5 سنوات متتالية.

وحقق قطاع الاتصالات وتكنولوجيا المعلومات إيرادات بلغت 315 مليار جنيه في العام المالى الحالى بنسبة نمو حوالى 75%.

أما عن الأسعار الحالية لكروت الشحن لجميع الشركات فهي، كارت شحن 10 جنيه، وبيُباع بسعر 12 جنيه وبيوفر رصيدًا فعليًا بقيمة 8.5 جنيه، وكارت شحن 25 جنيه واللي بيتباع بسعر 30 جنيهً وبيوفر رصيدًا بقيمة 21.5 جنيه، أما كارت ال50 جنيه فبيتباع  بسعر 60 جنيه وبيوفر رصيد بقيمة 42.5 جنيه، وأخيرا كارت ال 100 جنيه بيتباع بسعر 120 جنيه وبيوفر رصيد فعل بقيمة 85 جنيه.

طب امته موعد زيادة الأسعار؟ 
بص يا سيدي، لحد دلوقتي مافيش كلام رسمي كلها تلميحات وتوقعات، لكن كل حاجة هتم في الوقت المناسب، زي ما قال جهاز تنظيم الاتصالات، خاصة وإن في موافقة مبدئية من الجهاز باعتباره هو المنظم لقطاع الاتصالات في مصر.

وده بيجي في الوقت اللي مصر بتستعد فيه لتطبيق خدمات الجيل الخامس، وبيحصل دلوقتي تطوير ومد البنية الأساسية للتأكد من حصول المواطن المصري على نفس الخدمات بنفس الجودة في أي منطقة في مصر، يعني كله هيستفيد من التكنولوجيا وقريب جدا.