لو معاك فلوس وبتفكر تستثمرها في إيه.. دهب ولا عقارات ولا شهادات ادخار.. هنقولك ليه لو ناوي على العقارات استنى شوية وشوف الفيديو ده الأول وبعدها قرر..

سوق العقارات ليه فترة كبيرة مش مستقر من ساعة أزمة الدولار اللي طلت برأسها في بدايات 2022 واللي بسببها ارتفعت اسعار العقارات بشكل كبير جدا بسبب ارتفاع تكاليف البناء وارتفاع أسعار الحديد والأسمنت واسعار المواد المستخدمة في التشطيب زي الأدوات الصحية والكهربائية والسيراميك والبويات ودا كله في النهاية كان بيضاف على سعر الشقة أو البيت النهائى وعشان كده حصل اقبال كبير على الاستثمار في العقار باعتباره سوق بيرفع بسرعة واي ارتفاع في الأسعار معناها مكسب اضافي .

وبعد الأزمة السودانية ووصول آلاف من السودانيين لمصر ارتفع الطلب على الشقق الإيجار وحصلت قفزة تانية في الايجارات ودا عمل انتعاشة في سوق العقارات مرة تانية.. ومرت الايام وحصل عودة لعدد كبير من اللاجئين وقل الطلب على الشقق وبالتالي أسعارها نزلت بشكل كبير ومع الاضطرابات الكتير في سوق العقارات بقي الاستثمار فيه مش مضمون اووي خاصة مع إستعداد وزارة الإسكان والمرافق والمجتمعات العمرانية الجديدة على طرح آلاف الشقق الجديدة ضمن برامج الإسكان ولأن فيه اقبال كبير على إعلانات وزارة الإسكان الطلب على العقارات بيقل في السوق العادي ودي بسبب كثرة المعروض من الوحدات السكنية..

كمان فيه حاجة تانية مهمة لازم تعرفها قبل ما تستثمر فلوسك في العقار وهي إن قانون الايجار القديم بيتغير ودا معناه هيضيف ما بين 300الى 400 ألف شقة مغلقة المعروض السكني ومع اعلانات الإسكان الأخيرة هيحصل تشبع كبير للسوق في وقت قصير ودا ممكن يسبب ركود في سوق العقارات أو يعمل فقاعة عقارية لو الناس اللي اشترت قررت تبيع في وقت واحد

يعني لو معاك فلوس وعاوز تستثمرها في العقارات يبقي لازم تعرف الاول السوق رايح على فين  والنصيحة انك تصبر الأول لغاية على الأقل ما تخلص أزمة قانون الايجار القديم ويتم الطرح الرسمي لوحدات ووزارة الإسكان الجديدة وبعدها تشوف منحنى الأسعار رايحة على فين وبعدها تاخد القرار لكن خلونا نأكد على حاجة مهمة جدا وهي إن الاستثمار في العقار استثمار ناجح دائما لانه استثمار طويل الأجل يعني لو اشتريت عقار متبيعهوش قبل 5 سنين لو عاوز تكسب فيه بشكل كبير ودا لأن الطلب على السكن في مصر هيفضل مستمر بشكل متزايد مهما كان المعروض كبير من الوحدات السكنية ودا بسبب الزيادة في عدد السكان ووجود عدد كبير من الشباب في سن الزواج.