حصل القاهرة 24 على نص التحقيقات في قضية مقتل مينا موسى ممرض المنيا، عقب استدراجه من محافظة المنيا مسقط رأسه إلى محافظة القاهرة وتحديدًا بمنطقة الزاوية الحمراء، من أحد الأشخاص بحجة وجود فرصة عمل، وما إن وصل حتى احتجزه المتهم بمعاونة آخر لمساومة أسرته على مبلغ مالي، وحال مقاومته للأول ضربه حتى الموت وقطع جثته وألقى بها في ترعة الإسماعيلية.
 

قضية مقتل مينا موسى ممرض المنيا 

واستجوبت جهات التحقيق المتهم الثاني بقتل مينا مرسى ممرض المنيا، وجاءت أقواله كالتالي: 

س: متى وأين حدث ذلك؟

ج: إبراهيم كلمني قبل الواقعة بأسبوع واتفق معايا ورحتله البيت يوم الأحد 2024/9/29 الساعة 12 صباحًا في الزاوية الحمراء معرفش العنوان بالظبط ومسكنا مينا في نفس اليوم الساعة 11 صباحًا في نفس البيت وأنا مشيت في ساعتها بعد ماخدت الفلوس واتمسكت يوم 2024/10/1 الساعة 10 مساء من المطعم اللي كنت شغال فيه في مدينة بدر.

س: من هم القائمين على ضبطك تحديدًا؟

ج ضابط وأربعة أمناء معرفهمش.

س: هل من ثمة حوار دار بينك وبين سالفي الذكر وما مضمونه؟

ج: أه قالولي إنت تعرف إبراهيم قولتلهم اه قالولي إحنا عرفنا كل حاجة فاحكتلهم كل اللي حصل.

س: هل من ثمة تفتيش لشخصك؟

ج: أيوة.

س وما الذي أسفر عنه ذلك التفتيش؟

ج: الفلوس النقد والهاتف

س ما سبب القبض عليك؟

ج عشان هما عرفوا اللي عملناه في مينا.

س: ما هي طبيعة عملك وكم تتقاضى نظيره؟

ج: أنا شيف سندويتشات كريب في مطعم بمدينة بدر وبقبض 280 جنيه في اليوم.

س: ما هي مؤهلاتك التعليمية؟

ج أنا معايا دبلوم صنايع.

من: ما هي طبيعة العلاقة بينك وبين إبراهيم رمضان؟

ج: هو يقربلي من ناحية الأب من بعيد وهو جاري في المنيا في مركز ديرمواس وعلاقتنا ببعض إننا صحاب والعلاقة ما بينا كويسة مافيش أي حاجة لحد ما جالي عند المحل عشان اتزنقت في فلوس وهو كان مسلفني وماكنتش برد عليه وعرض عليا الموضوع بتاع مينا.

م: ما الذي تعرفه عن الطبيعة الحياتية واليومية لمينا؟

ج: اللي أعرفه إنه كان شغال ممرض في دار مسنين ومش حابب يتجوز وبييجي المنيا كل فترة وما بيقعدش كتير.

س: هل من ثمة خلافات فيما بينكم؟

ج: لا خالص ماكنش فيه أي خلافات.

س: ما هي علاقتك بالمجني عليه مينا موسى؟

ج: أنا معرفوش خالص غير يوم ما شوفته في الشقة.

م: ما هي طبيعة الاتفاق بينك وبين المتهم إبراهيم تحديدًا ؟

ج أنا لاقيت إبراهيم بيقولي إن في واحده ناصبه على ناس في فلوس فإحنا هنجيب أخوها نخوفه وتسلمه للناس اللي ليهم الفلوس وهما يتصرفوا معاه وإحنا هناخد فلوس وأنا دوري بس إني أبقى موجود وأخوفه.

س: ما هي وسيلة اتفاقكم آنذاك؟

ج الكلام والاتفاق عن طريق التليفون.

س وما مقابل مساعدتك له لارتكاب هذه الواقعة؟

ج: هو قالي إن الفلوس اللي ليه عندي خلاص وهيديني 1000جنيه

س وما الذي دعاك لقبول هذا العرض؟

ج عشان أنا بمر بضائقة مادية ومحتاج أي فلوس.

س: ما الذي بدر منك عقب عرضه عليك لارتكاب تلك الواقعة؟

ج: أنا قولتله ماشي أنا معاك واتفقت معاه إني أروحله قبلها بيوم أبات معاه

س: ما هي نيتك آنذاك وقت اتفاقك مع المتهم سالف الذكر على ارتكاب تلك الواقعة ؟ 

ج: أنا اللي كان في نيتي إني أروح مع إبراهيم لما يجيب اللي اسمه مينا وأقف معاه أخوفه بس عشان أخد فلوس من إبراهيم أفك بيها زنقتي.