الإثنين 02/ديسمبر/2024 - 01:27 ص

كشفت التحقيقات في القضية رقم 1268 لسنة 2024 جنح أول الشيخ زايد، والمتهم فيها نجل زوجة الشيف الشربيني بدهس عامل دليفري متسببا في وفاته على طريق الشيخ زايد بالجيزة، تفاصيل جديدة.

أقوال الشهود بواقعة دهس نجل زوجة الشيف الشربيني لعامل دليفري

وحصل القاهرة 24 على التحقيقات في واقعة دهس عامل دليفري على يد نجل زوجة الشيف الشربيني، مما تسبب في وفاته.

وقال أحد الشهود أمام جهات التحقيق عند استجوابه عن معلوماته بشأن الواقعة محل التحقيق: اللي حصل إن حوالي الساعة 1 وربع صباحًا كنت ماشي بعربيتي في شارع البستان قدام كمبوند.. وكنت ماشي تقريبًا على سرعة 70 أو 80 كيلو متر في الساعة.. لقيت مرة واحدة عربية بتعدي من جنبي نوعها رانج روفر بيضاء واللي سايقها قافل كل أنواره.. مع إن الدنيا كانت ضلمة وعدى بسرعة جنونية من اليمين.. وممكن يكون كاسر سرعة 200 بكتير.

وأكمل الشاهد: تقريبًا عامل الدليفري كان على بعد 100 متر وبيحضن على اليمين.. وأنا كنت شايفة عشان أنا كنت منور النور العالي بتاعي.. ومرة واحده العربية الرانج روفر خبطته وطيرت عامل الدليفرى في الجو.. والموتوسيكل فضل يتقلب على الأرض.. فأنا جريت ورا العربية عشان أوقفها وفعلا وقفت.

وتابع الشاهد أمام جهات التحقيق: نزل من العربية شابين واحد اللي كان سايق واسمه مازن.. ومعرفش بقية اسمه.. وواحد تاني كان معاه بس معرفش اسمه ايه.. وشكلهم صغيرين أقل من 18 سنة.. وهو فضل يقول إن والده جاي.. ومرة واحده اختفى وبعدها لقيت عربية تقريبا بي إم دبليو او تسلا نزل منها الشيف الشربيني.. وعرفت إنه صاحب العربية الرانج روفر.. وإن ابنه كان واخدها من وراه زي ما هو قال.. ولقيت فجأة ونش جه عشان ياخد العربية الرانج روفر.. بس أنا والناس اللي اتلمت منعناه.. وبعد كده الشيف الشربيني ركب العربية اللي كان جاي بيها ومشي.. وفضلت واقف في الشارع لغاية لما الشرطة جات.