قالت الفنانة نجوى فؤاد إنها ترفض تجسيد سيرتها الذاتية في عمل فني، لأن هناك العديد من المواقف والأوقات التي تمر على الإنسان ويرفض الإعلان عنها، مشيرة إلى أنها أفصحت على نحو 99 % من تفاصيل حياتها عبر اللقاءات الصحفية، وترغب في الاحتفاظ بما تبقى سرًا.

أضافت "فؤاد" خلال مداخلة هاتفية مع المذيع رضا محروس في حلقة مساء الخميس من برنامج "حلوة الحياة" المذاع عبر شاشة "الحدث اليوم"، أنها ليست متجوزة حاليًا ولم تنجب أبناء، بسب عملها في الفن، موضحة: "أنا مش متجوزة ومعنديش أولاد ومعلمتش أسرة للأسف، الأضواء خدتني ونسيت إن المفروض يكون لي أولاد وأسرة".

أوضحت أنها تحصل حاليًا على معاش لا يتجاوز الـ600 جنيه شهريًا، مضيفة: "يعملولي إيه دلوقت! ميجبوش طبقين فول الصبح.. إن شاء الله وزارة الثقافة تعتني بينا شوية، وإن كانوا عاملين لينا كارت معونة للعلاج، لكنه ميكفيش، لأن الدنيا غالية والظروف اتغيرت".

تابعت: "دكتور أشرف زكي كتر خيره اتكلم كتير وبيشوف مشاكل كتير وبيعتني بينا وبيزورنا وبيسأل علينا، هو راجل طيب جميل وعظيم".

في سياق آخر، قارنت نجوى فؤاد بين أجور الفنانين حاليًا وفي الماضي، مشيرة: "إحنا الجيل اللي تعب وخد ملاليم، والجيل اللي طلع دلوقت بياخد ملايين، ما شاء الله ربنا يزيدهم وينجحهم؛ ربنا قسم لهم كده".