الثلاثاء 17/ديسمبر/2024 - 07:21 م

كشفت التحقيقات في قضية وفاة الفنان تامر ضيائي، تفاصيل شجاره داخل المعهد القومي للأورام، مع فرد أمن بالمعهد القومي للأورام، والتي على إثرها حدثت الوفاة في يوليو 2024.

تحقيقات قضية وفاة الفنان تامر ضيائي

وحصل القاهرة 24، على نص تحقيقات القضية، وباستدعاء الشاهدة الأول على الواقعة وهي شيماء. ع. ح 43 سنة ربة منزل، وبسؤالها ما هي معلوماتها بشأن الواقعة محل التحقيق؟ أجابت: اللي حصل إن يوم 17/7/2024 حوالي الساعة 9:30 الصبح كنت رايحه المعهد القومي للأورام اللي في التجمع الأول أنا ووالدتي، عشان كان عندها جلسة هرمون كيماوي.

وأكملت: وروحنا ووصلنا المعهد ودخلنا ووقفنا في الدور بتاعنا، ومرة وحدة دخل علينا واحد كان بنيته قوية وكبير في السن، وكان معاه حالة على كرسي متحرك وراح حط الكرسي المتحرك قدام البوابة اللي واقف عليها فرد الأمن وقفل بيها الممر وعايز يدخل علطول، فراح فرد الأمن قاله يا أستاذ لما الحالة اللي جوه تخرج أنا هدخلك فصمم على الدخول، وقاله أنا مش همشى ومتتكلمش خالص ورد عليه فرد الأمن قاله يا فندم مينفعش لما أى حالة من اللي جوه تخرج أنا هدخلك، لو سمحت انتظر على جنب، وفرد الأمن كان كل شوية يتحايل عليه عشان ياخد الكرسي ويقف على جنب.

وأردفت الشاهدة خلال أقوالها أمام جهات التحقيقات: وأنا لما لقيته مصمم كده، قولتله حضرتك كده قفلت البوابة ومحدش هيعرف يدخل منها بسبب الكرسي؛ فانتظار عشان كلنا ندخل ومنعطلش حد، والشخص التاني كان مصمم على الدخول وقال لفرد الأمن أنا هدخل دلوقتي، وراح زعق لفرد الأمن وهو بيشتمه راح الراجل ضرب فرد الأمن بأيده على وشه بالقلم، وفرد الأمن ساعتها حاول يدافع عن نفسه.

وأضافت: ومعرفش لأن الناس اتدخلت وحاولو يفصلوا ما بينهم وأخدوا الراجل ده على جنب، وأبعدوهم عن بعض، والناس اتلمت وأخدو الراجل ناحية عيادات السكر والضغط، وهما واخدينه وكان ماشي كويس معاهم، وفجأة وقع على الأرض فراحوا اخدوه على عيادات السكر علشان يقيسوا السكر ومعرفش إيه اللي حصل بعد كده؟ وده كل اللي أنا شوفته وسمعته.