الأحد 24/نوفمبر/2024 - 10:11 م

نشرت سيدة عبر حسابها بمنصة تيك توك، فيديو عبرت فيه عن استيائها، بعد تعرضها للنصب من سائق تاكسي زعم احتياجه للمال بسبب وفاة والدته وضرورة سفره إلى محافظة أخرى.

سيدة تتعرض للنصب من سائق تاكسي

ونشرت آية سيد فيديو عبر حسابها بمنصة تيك توك قالت فيه:  يا جماعة فيه طريقة نصب جديدة.. وأنا أول اللي اتنصب عليهم من سواق تاكسي، فجأة وقف في نص الطريق يقولي أمي ماتت، بعد ما جاله تليفون وفضل يقول اقفلي اقفلي.

وأضافت: فالسواق ده قالي أنه مسافر البلد ومحتاج بـ 220 جنيه بنزين، فطبعا صعب عليا أنه حرام مسافر ومفيش معاه فلوس واديته الفلوس اللي محتاجها، طبعا خلي بالكو من الموضوع ده لأنه بيحصل مع ناس كتير أوي أو حد بيقول بنتي بتغسل كله وبنلم لها فلوس.

وأردفت: دي طريقة نصب جديدة وكرييتيڤ أوي وحسبي الله ونعم الوكيل في اللي بيقول حاجة مش موجوده فيه أو بيدعي المرض يجيله، واللي بيدعي إن أمه ماتت مش عارفة ازاي بيجيله قلب يعمل كده منك لله وربنا ينتقم منك عشان دي مش طريقة.

شكاوى ضد سائقي التاكسي

ونشر عدد من مستخدمي تيك توك شكاوى ضد سائقي التاكسي، تفيد بأنهم تعرضوا للنصب من هؤلاء السائقين بطرق مختلفة، حيث كتب مستخدم قائلا: حصلت معايا كتير أوي اللي يقول مراتى بتولد.. واللي عايز يجيب حقنة سرطان لأبنه فعلا شوفنا كتير من الكلام ده.

وأضافت صاحبة حساب قائلة: حصل معايا موقف زي ده من سواق قالي احنا بنجمع فلوس لواحد مريض ومعاه كيس فيه فلوس، وقالي اهو شوفيه لو مش مصدقانى، واضطريت أدفع له مبلغ مالي كبير لأنه صعب عليا بطريقته وعيط قدامي

وأردف شخص آخر: والله من شهرين سواق تاكسي قالي يا ابني عندنا جارتنا ماتت وسابت طفلة صغيرة وأنا بربيها في بيتي ويحاول اجمع لها فلوس بس مش معايا فممكن تساعدني بأي حاجة تقدر عليها عشان اشتريلها اللبن البودرة.

وأضاف مستخدم آخر:  كنت مسافر والسواق جاله تليفون قالي ابنه نقلوه المستشفى، وعايز حالا احول لهم على انستا علشان ما عندوش انستا حولنا له وطبعا ما دفعهمش تاني.

وكتب صاحب حساب: في واحد بيقولي بجهز بنتى وناقص الخلاط والغسالة، ومعرفش ايه ويطلب فلوس 
حصلت معايا مرتين من سواقين التاكسي.

وأضاف شخص آخر: النوعية دي منتشرة من زمان وركبت معاه ويقعد يقول عيالي عيانين، وأحسن يموتوا وأنا مش معايا روحت سبت مبلغ كبير طبعا وبنتي بالصدفة ركبت معه بعد سنتين عمل نفس الحركة.