هو إيه سر تهافت الشركات الألمانية على دخول السوق المصري، وكم عدد الشركات اللي أبدت رغبتها في كده أو قدمت طلبات رسمية للحكومة، وامته هنشوفها بتشتغل داخل مصر، وإيه هي التسهيلات اللي قدمتها لها الحكومة المصرية عشان تشتغل.. هنقولك كل التفاصيل في الفيديو ده.
 

المهندس حسن الخطيب وزير الاستثمار والتجارة الخارجية، سافر من كام بوم لألمانيا، وهناك التقى مع وزير الدولة للشؤون الإقتصادية بولاية شمال الراين فيستفاليا، وناقش معاه إمكانيات التعاون المشترك  بين الجانبين في مجالات التجارة والاستثمار.

وبالفعل، تم الاتفاق على قيام وفد برئاسة الوزير الألماني، بزيارة لمصر بعد كام شهر، ومعاه طبعا عدد من الشركات الألمانية، اللي ناوية تعمل الدورة التانية للقمة الاقتصادية بين مصر وولاية شمال الراين.

ونقدر تقول، إن في حوالي 100 شركة ألمانية مهتمة بالسوق المصري، وعايز تقتحمه أو تدخله من أوسع أبوابه، وتبدأ تشتغل في مصر وتروج لمنتجاتها كمان، ومن هنا الحكومة المصرية هتقدملها كل التسهيلات والتيسيرات في كل المجالات، وكمان هتحفزها على الاستمرار وتقدم لها كل الدعم الممكن.

عشان كده، قال وزير الاستثمار، إن في تطورات اقتصادية حصلت في السوق المصري، وفي سياسات مالية ونقدية وصناعية وتجارية بتتبناها الدولة المصرية حاليا، وأكد كمان اننا مهتمين بتعزيز العلاقات الاقتصادية والتجارية بين مصر وولاية شمال الراين فيستفاليا.

كمان، الوزير وجه الدعوة لكل الشركات المشاركة بالقمة الاقتصادية، لاستغلال الفرص الاستثمارية المتاحة بالسوق المصري، واللي بيعتبر حلقة الوصل بين السوق الألماني والأسواق العالمية التانية.

واتكلم الوزير عن نتائج جهود الإصلاح الاقتصادي اللي بتتبناها الحكومة المصرية وكمان أهم التحديات وسبل مواجهتها، ووعد بتشهيل إجراءات العمل والاستثمار للشركات الأجنبية داخل مصر، وان هيكون مرحب بهم للعمل داخل السوق.

ونقدر نقول، إن زيارة وزير الاستثمار والتجارة الخارجية إلى ألمانيا، هتعمل دفعة قوية للعلاقات الثنائية على المستوى الاقتصادي والاستثماري، وكمان من أهم نتائجهل، توقيع مراسم توقيع إعلان مشترك بين التمثيل التجاري المصري ونظيره  NRW Global business، واللي بتضمن خطة عمل رقمية مشتركة لتعزيز التعاون الاقتصادي والتجاري والاستثماري بين مصر وولاية شمال الراين فيستفاليا، وزيادة حجم التبادل التجاري والاستثماري بين مصر والولاية خلال الفترة الجاية ، وهيتم متابعة اللي اتحقق من خلال القمة الاقتصادية القادمة بالقاهرة.

ومن ضمن الشركات اللي ناوية تشتغل في مصر قريب، هي  شركة fertiglobe، وكمان شركة Thyssenkrupp، وشركة Energy for climate، وشركة  Rayvenlaser، وبالفعل اتناقشوا عن الفرص الاستثمارية المتاحة في مصر وكيفية تعظيم حجم الاستثمارات الألمانية في مصر، وكمان تذليل العقبات اللي بتواجه تدفق تلك الاستثمارات إلى مصر.

ومن هنا، اتوقع وزير الاستثمار إن حجم التبادل التجاري بين مصر وألمانيا يوصلل 9 مليار يورو بنهاية السنة الجاية، مرتفعا من 7 مليار حاليا، وإن نصيب ولاية شمال الراين يكون 3 مليار يورو وفقا للخطة الموضوعة وفي حالة دخول الشركات للسوق المصري.