عمرك فكرت إزاي ماكينات الصراف الآلي بتشتغل؟ طب لو حصلت مشكلة وأنت بتسحب فلوسك تعرف تعمل إيه؟ والأهم إيه الخطوات اللي تخليك تسحب أموالك بسهولة من غير تعقيد ولا قلق؟ في الفيديو ده هنشرحلك كل حاجة ببساطة خطوة بخطوة علشان فلوسك تكون في أمان وتتعامل بكل سهولة

ماكينة الصراف الآلي أو الـATM، ببساطة هي جهاز بنكي موجود في كل مكان تقريبًا جنب البنوك في المولات أو حتى في الشوارع الرئيسية..و وظيفتها إنها تسهّل عليك الوصول لفلوسك في أي وقت بدل ما تضطر تدخل البنك وتقف فى طابور او تقعد تستنى دورك

طب ايه خطوات سحب الفلوس بسهولة من الماكينات؟

قبل ما تتحرك لماكينة الصراف اتأكد إن الكارت البنكي بتاعك شغال وشوف تاريخ الانتهاء المكتوب على الكارت ولو انتهى روح البنك عشان تجدده.. والأفضل تختار ماكينة في مكان مأهول ومراقب بالكاميرات..و ده مهم جدًا علشان تحافظ على سلامتك.. بعدين هتحط الكارت في المكان المخصص ليه وتستنى شوية لحد ما الشاشة تطلب منك تدخل الرقم السري .. بعدها اكتب الرقم السري بتاعك لكن خلي بالك متخليش حد يشوفك وغطي الشاشة بإيدك لو في ناس حواليك

بعدها هتختار الخدمة المناسبةمن الشاشة الرئيسية خدمة "سحب الأموال"  مصلا بعدها حدد المبلغ اللي محتاجه ولو كل حاجة تمام دوس "تأكيد" أو "OK" .. خُد الكارت أول ما يخرج واستنى لحد ما الفلوس تطلع من المكان المخصص عدّ الفلوس بسرعة وتأكد إنها صح.

طب إيه تعمل لو حصلت مشكلة؟

لو الكارت ما خرجش اتصل بخدمة العملاء بتاعة البنك فورًا ولو الفلوس ما طلعتش بردو اتصل بخدمة العملاء واحتفظ بالإيصال لو طلع.. ولو الرقم السري اترفَض تأكد إنك بتكتبه صح ولو المشكلة مستمرة روح البنك للتأكد من كارتك.

وخلينا نقولك شوية نصايح لضمان عملية سحب آمنة .. ما تستخدمش ماكينات مش شغالة كويس أو بايظة.. واتأكد إنك بتسحب من ماكينة تابعة لبنكك لتوفير رسوم السحب الإضافية.. ومتحتفظش برقمك السري مكتوب على الكارت أو في أي مكان سهل الوصول ليه

دلوقتي عرفت إزاي تسحب فلوسك بسهولة وأمان من ماكينة الصراف الآلي! لو عندك أي استفسار تاني متنساش تسيبه في الكومنتات وهنجاوبك على طول. ولو استفدت اعمل شير علشان غيرك يستفيد