يا ترى امته مشروع الأتوبيس الترددي هيخلص، وهيخدم أي مناطق إيه، وهل هيكون فعليا بديل للميكروباصات على الطريق الدائري، طب سعره التذكرة هتكون زي الميكروباص ولا مدعمة.. هنقولك كل التفاصيل في التقرير ده فتابعنا للآخر.
دلوقتي، وزارة النقل المصرية بتستعد لتشغيل نظام الأتوبيس الترددي اللي هو BRT على الطريق الدائري، وهيتم تشغيل أتوبيسات كبيرة مكيفة وشغالة بالكهربا، هتمشي في مسارات منفصلة عن حركة المرور على الطريق، وهتقدر تسحب كل كثافات الركاب الموجودة عليه
ونقدر نقول إن المشروع ده، هدفه تخفيف الزحام المروري وتقليل التلوث البيئي، لأن الأتوبيس الترددي هيشتغل بالطاقة الكهربائية.
ومع بداية تشغيله، هيتم منع الميكروباصات من التحميل على الطريق الدايري، ومش هيسمح للركاب بالصعود إلى الطريق مرة تانية إلا من خلال محطات الأتوبيس الترددي، وهي محطات معزولة مش هيدخلها الميكروباص أبدا.
ومن هنا، أكدت وزارة النقل أن تسعير تذكرة الأتوبيس الترددي هتكون مرنة، وبتعتمد على عدد المحطات اللي هيستقلها الراكب، وده بهدف تشجيع المواطنين على دفع المقابل الفعلي للرحلة، ولكن هيتم توفير سعر تنافسي وخدمة عالية الجودة.
كمان، الأتوبيس الترددي هو جزء من خطة وزارة النقل لتوسيع شبكة وسائل النقل المستدامة والصديقة للبيئة، وبيتسم النظام ده بالكفاءة والأمان، وبيعتبر بديل ممتاز للميكروباصات، لانه هيساهم في تقليل الزحام على الطريق الدايري، وهيكون بديل كمان للخط الخامس لمترو الأنفاق.
عشان كده، وزارة النقل عملت محطات شحن كهربائية على امتداد محطات الأتوبيس الترددي على الطريق الدائري، عشان تضمن استمرار تشغيل الأتوبيسات
أما بالنسبة للمناطق المستفيدة أو محطاته، فالمشروع بيتضمن 49 محطة على الطريق الدائري، تم تنفيذها على مرحلتين، وشملت الأولى 36 محطة بتكلفة تقدر بحوالي 9.5 مليار جنيه.
والمحطات تم اختيار مواقعها في مناطق سكنية ذات كثافة سكانية مرتفعة، وكمان قريبة من وسائل النقل الجماعي الأخرى، والمرحلة الأولي من المشروع ده بتضم 36 محطة، هي: (محطة المشير طنطاوي، كايرو فيستيفال سيتي، أكاديمية الشرطة، طريق السويس، محطة عدلي منصور، موقف العاشر من رمضان، محطة غرب الرشاح، التروللي، مؤسسة الزكاة، مصرف بلبيس، عزبة الجزيرة، المرج، الرشاح والخصوص، مسطرد، متولي الشعراوي، العصار، منطي، إسكندرية الزراعي، بسوس، بسوس القناطر، الوراق، تحيا مصر، مترو إمبابة، بشتيل، أحمد عرابي، أرض اللواء، محور 26 يوليو، المعتمدية، زنين، صفط اللبن، منشية البكاري، النور، مسجد المدينة، فيصل والهرم بالإضافة لإلي محطة ترسة، مصر للطيران، الطالبية، المنيب، البحر الأعظم، الزهراء، العزبة، محور الحضارة، الجزائر، الأوتوستراد، الهضبة الوسطي، سيتي سنتر المعادي، الصيد، البروان، محور الشهيد، مدخل التجمع).
أما عن طرق الدخول لمحطات الاتوبيس الترددي السريع، فهيتم الدخول للمحطات اللي موجودة على الطريق الدائري، من خلال نفق أو سلم المشاه.
ضيف على كل ده، إن الأتوبيس الترددي هيربط بين الطريق الدائري ووسائل النقل الأخرى زي المترو، القطارات، ومواقف السيرفيس، كمان محطاته هتكون مزودة بشاشات لعرض مواعيد الوصول وزمن التقاطر.
كمان هيكون في ساحات انتظار مخصصة للسيارات الملاكي أسفل محطات الاتوبيس، أما دورة العمل فهتكون على مدار الـ 24 ساعة من خلال 3 دوريات.
وأخيرا، موعد تشغيله فمقرر لها في الربع الأول من السنة الجاية 2025.
0 تعليق