هو ايه اللي حصل في مصر الساعات اللي فاتت وإيه أخر أخبار الدولار والأسواق والأستثمارات والاحداث الهامة.. خليكم معانا النهاردة وهتعرفوا التفاصيل في التقرير  دا

على مدار الايام اللي فاتت حصلت تطورات كتيرة في ملف الاقتصاد وصدرت أرقام كتيرة وبيانات مالية كلها بتقول إن الاقتصاد المصري رايح في حتة تانية..
وهنبدأ من الحدث الأهم في الفترة اللي فاتت وهو انعقاد قمة مجموعة الثماني الاسلامية النامية واللي بتضم مجموع سكان مليار نسمة بيمثلو 14% من سكان العالم
والمجموعة بتضم أكبر الدول الإسلامية واكترها تأثيرا وهي  مصر ـ تركيا ـ إيران ـ إندونيسيا ـ باكستان ـ بنجلاديش ـ نيجيريا ـ ماليزيا.
القمة عقدت في القصر الجمهوري الجديد في العاصمة الادارية وبرئاسة الرئيس السيسي في القاهرة تحت شعار "الاستثمار في الشباب ودعم الشركات الصغيرة والمتوسطة : تشكيل اقتصاد الغد " وركزت على الاقتصاد والاستثمار والاتفاقيات المشتركة للنهوض بالمجموعة.
خبراء الاقتصاد شايفين إن مجموعة الثماني الاسلامية قدامها فرصة كبيرة عشان تتحول لمارد اقتصادي في العالم في حال استغلال كل الامكانيات في الدول الاعضاء.

من بين الأحداث المالية الهامة كانت أرقام البنك المركزي المصري بخصوص ارتفاع صافي الأصول الاجنبية لاكتر من 11 مليار دولار في نوفمبر وهي الفرق بين ودائع ومدخرات العملة الصعبة وبين احتياجات المركزي من الدولار  وكمان تحقيق البنك المركزي صافي ربح بقيمة 88.3 مليار جنيه بنهاية نوفمبر 2024

وكشف قائمة المركز المالي للبنك عن تحقيق إجمالي حقوق الملكية لتسجل 143.192 مليار جنيه بنهاية نوفمبر الماضي، مقابل 162.413 مليار جنيه بنهاية أكتوبر الماضي.

وسجل رأسمال البنك المركزي نحو 21.600 مليار جنيه، وسجلت الاحتياطيات 403.335 مليار جنيه بنهاية نوفمبر 2024.

وبالتزامن مع ذلك ارتفعت إجمالي أصول البنك المركزي لتسجل 6.249 تريليون جنيه بنهاية نوفمبر 2024، مقابل 6.213 تريليون جنيه بنهاية أكتوبر 2024.
ــــــــ
من الأحداث المهمة في الساعات اللي فاتت كان الإعلان عن تشكيل مجلس التنسيق الأعلى بين مصر والسعودية
ويهدف المجلس إلى تكثيف التواصل وتعزيز التعاون بين مصر والسعودية في مختلف المجالات خاصة الاقتصادية والاستثمارات.
ـــــــ
وهنروح للدولار والتقرير المهم اللي كشفت عنه وكالة فيتش للتصنيف الائتماني واللي قالت فيه إن الدولار مش هيرتفع ارتفاعات مفاجئة تاني وإن مش هيزيد عن حاجز 50 و51 جنيه في الفترة الجاية وسعره هينزل مع استمرار التدفقات الدولارية

طيب أي الجديد في قصة الدولار؟
وقالت وكالة فيتش ان استمرار ارتفاع الدولار مقابل العملة المصرية إلى مستويات أكتر من 50 جنيه مش هيستمر في ظل تحسن معنويات المستثمرين والتدخل في السوق يعني الوكالة استبعدت في اخر تقرير ليها من شوية استمرار ارتفاع أسعار الدولار في السوق المصري إمام الجنيه
ــــــــــــ
من الأحداث الاقتصادية كان افتتاح التشغيل التجريبي لأكبر مصنع غزل في العالم.
وبدأت مصر رسميًا مرحلة جديدة في صناعة النسيج بإعلان التشغيل التجريبي لأكبر مصنع نسيج في العالم اللي موجود في مدينة المحلة الكبرى عاصمة صناعة الغزل والنسيج.. المصنع ده جزء من خطة طموحة جدًا للدولة المصرية عشان تستعيد ريادتها في مجال كانت دايمًا مميزة فيه على مستوى العالم.. يعنى المصنع ده مش مشروع صناعي وخلاص ده خطوة استراتيجية عشان نرجع بقوة على خريطة الاقتصاد العالمي