ملايين الشباب في مصر دلوقتي بيفكروا يعملوا مشروع 2025خاص بيهم، بيكونوا استقروا على فكرة معينة ومطرقعة، ويقدروا يطلعوا منها بمكاسب مادية كل يوم، ولكن رغم قوة الفكرة وقابليتها للتطبيق أو التنفيذ على أرض الواقع، إلا أن بيكون في مشكلة وهي التمويل… طب لو حضرتك عايز تعمل مشروع صغير وعايز حد يمولك بالفلوس.. تعمل إيه؟

نقدر نقولك إن بنك التعمير والإسكان، أطلق مبادرة لدعم أصحاب المشاريع الصغيرة والمتوسطة، وبيقدم قروض بتصل قيمتها ل 5 مليون جنيه، وجه بيجي ضمن دعم الدولة المصرية لقطاع المشروعات الصغيرة اللي بيعتبر محر رئيسيً للنمو الاقتصادي وبيوفر فرص عمل كثيرة للشباب.

بس لازم حضرتك تقدم شوية مستندات عشان تحصل على التمويل من بنك التعمير والإسكان، واللي أولها إن صاحب النشاط أو المشروع اللي عايز القرض مثلا لشراء آلات ومعدات لمشروعه، فلازم يقدم المستندات اللازمة لصرف القرض زي بطاقة الرقم القومي سارية لصاحب النشاط وشركاه عند وجودهم، وكمان طلب تمويل ومستندات الشركة القانونية، وماتنساش عقد الإيجار أو التمليك لمقر الشركة المراد تمويلها.

ضيف على ده، إنك تحضر قوائم مالية للشركة لآخر 3 سنين من نشاطها، بالإضافة للمركز المالي المعتمد من محاسب قانوني، بس يكون حديث، وكمان مستندات تثبت الموقف الضريبي والتأمينات، ودراسة جدوى للمشروع بتاعك، بس يا سيدي.

وعشان تكون فاهم، فقرض قرض التعمير والإسكان للمشروعات الصغيرة له مميزات كتيرة، زي مثلا تنوع برنامج التمويل، يعني ممكن تكون قروض تمول شراء الآلات والمعدات واللي هي قروض قصيرة الأجل، وبيتم سدادها خلال سنة كحد أقصى، أو ممكن تكون قرض متوسط وطويل الأجل يسدد على فترات تزيد عن السنة .

وممكن جدا، لأصحاب المشروعات الحصول على قرض التعمير والإسكان بفايدة متناقصة بتوصل ل 5% بس عند انطباق شروط مبادرة البنك المركزي على مشروعهم، أو بفائدة 15% متناقصة إذا انطبقت على المشروع شروط مبادرة مجلس الوزراء لتمويل الشركات، واللي أهمها وصول حجم الأعمال ل 50 مليون جنيه.

ونقدر نقول، إن الحد الأقصى لقرض المشروعات الصغيرة ومتناهية الصغر، بيوصل ل 5 مليون جنيه، وكمان بيقدم خدمات تانية تدعم المشروع، زي تدريب العمالة وإعداد ورش عمل وخدمات دراسة الجدوى وغيرها من الخدمات.

ولو لسه ماستقرتش على فكرة المشروع، فنقدر نطرح على حضرتك مجموعة أفكار، زي مثلا تصنيع المنتجات اليدوية والإكسسوارات في البيت، لأن المنتجات دي لها شعبية متزايدة بين المستهلكين اللي بيفضلوا السلع الفريدة والمصنوعة يدوياً، كمان في مشروع ورشة لصنع الأثاث المنزلي الصغير، أو مستحضرات العناية الطبيعية، أو مثلا تعمل مزرعة على سطح بيتك، وغيرها من المشروعات المميزة، بس المهم تكون أنت ناوي تعمل حاجة.

وحاول، تشوف الأول أنت شاطر في إيه، وهتقدر تبدع فيه كويس ونفسك فيه يكون طويل، وعلى طول أبدا اشتغل.

فلو حضرتك ناوي ومصر تعمل مشروع صغير على قدم وبتدور على التمويل، فلن ورقك واطلع على أقرب فرع ليك لبنك التعمير والإسكان.