يا ترى إيه اللي ممكن يخلّي الجنيه المصري أقوى قدام الدولار؟ وإيه علاقة المصريين اللي شغالين برّه بالمعادلة دي؟ طب هل ممكن تحويلاتهم تكون المنقذ للاقتصاد؟

ارتفاع تحويلات المصريين بالخارج 

في الساعات الأخيرة البنك المركزي المصري أعلن عن ارتفاع ضخم في تحويلات المصريين بالخارج، واللي وصلت لـ20.8 مليار دولار خلال أول 9 شهور من 2024.

واوعا تكون فاكر الرقم ده رقم عادي.. دي زيادة ضخمة مقارنة بالفترة اللي قبلها.. وده معناه إن المصريين اللي بيشتغلوا برّه مش بس بيساعدوا عائلاتهم لكن كمان بيدعموا اقتصاد بلدهم بطريقة مباشرة

طب ليه التحويلات دي مهمة كده؟

لأن الدولار اللي بيجي من برّه بيدخل على طول في احتياطي العملة الأجنبية وده معناه استقرار أكتر للجنيه المصري..وكمان بيحسّن قدرة الحكومة على توفير السلع والخدمات اللي بتعتمد على الاستيراد بالدولار

السؤال المهم..إيه اللي خلّى التحويلات تزيد بالشكل ده؟

أول حاجة تسهيلات البنك المركزي في تحويل الأموال من برّه وده شجّع المصريين يبعثوا فلوس أكتر.

تاني حاجة المصريين برّه بقوا على وعي أكبر بضرورة دعم اقتصاد بلدهم خصوصًا في الأوقات الحرجة.. وكمان زيادة عدد المصريين المهاجرين أو اللي شغالين برّه بسبب فرص العمل الأفضل.

طب إزاي ده انعكس على الاقتصاد؟

احتياطي البنك المركزي من الدولار بقى أقوى وده ساعد في استقرار السوق.. والبنوك قدرت تلبّي طلبات العملاء على العملة الصعبة وده قلّل الضغوط على الجنيه المصري.. والأهم، وفّر دعم إضافي للاستثمارات والمشروعات القومية اللي بتعتمد على التمويل بالدولار

طب هل ده كفاية؟

تحويلات المصريين بالخارج مهمة جدًا لكنها لوحدها مش الحل الكامل.. عشان نضمن استقرار حقيقي، لازم نركز كمان على زيادة الإنتاج والصادرات، وتقليل الاعتماد على الاستيراد. ده اللي هيخلّي الاقتصاد المصري في أمان أكتر

في النهاية اللي بنشوفه ده بيقول إن المصريين سواء جوّه البلد أو برّه، قادرين على إحداث فرق حقيقي ومع الخطوات اللي بياخدها البنك المركزي لدعم الاقتصاد المستقبل ممكن يكون أفضل بكتير