السبت، 21 ديسمبر 2024 09:37 م 12/21/2024 9:37:31 PM

قال الرئيس عبدالفتاح السيسي إن الخطة التي نفذت مع مصر كانت خطة جديدة، موضحًا: «كانت أول مرة نشوف مواقع التواصل الاجتماعي تستخدم في تحريك الدنيا، ولغاية دلوقتي في حجم من الشائعات والكذب كتير أوي».

وأضاف السيسي، خلال كلمته في زيارة لأكاديمية الشرطة، والتي نقلتها قناة «إكسترا نيوز»، اليوم السبت: «كفاءة الكذبة إنه يكون فيها جزء حقيقي، ثم يتحط الأجزاء الأخرى، اللي الهدف منها تعظيم الضرر، دي خطط، وده شغل، وده مش هينتهي».

وتابع: «زي شائعة موضوع اختطاف الأطفال والنساء، وكإن مفيش أمن، أنا هفترض إن ده موجود بالفعل، هو الصح إنك تقوم تهدها، عشان تزود أكتر بدل ما يبقى الخطف نسبة قليلة يكتر، بدل من الخراب يبقى أد كده يكون أكتر».

وأوضح: «اوعى تفتكر إن ده حاجة داخلية، لأ، الشغل بيتعمل من أجهزة مخابرات، وأنا مش بتكلم على دول خالص، من حق الناس إنها تفكر تخربنا، لما تلعب مباراة الخصم اللي قدامك بيكون عايز يهزمك، مهارتك إنك تكون مدرب ومستعد تفشل خطته».

وأكمل السيسي: «لازم تكونوا عارفين إحنا لينا خصوم، والخصوم مش مصلحتهم إن مصر تبقى كويسة، بلد فيها 120 مليونا، معدلات الحركة والنمو بتاعتها لو استمرت كده لمدة 10 أو 15 سنة هنكون في حتة تانية، بفضل الله، مع غيري، مع اللي بعدي، متقعدوش كل شوية تهدوا في بلدكم».

-

واستطرد: «خلّوا بالكم، هما يومين واللي بعدي جاي، واللي بعد منه جاي، لكن البلد اللي قاعدة بناسها، يبقى نهد في بلدنا ولا نحافظ عليها؟! الخصم لن يتوقف وهيفضل شغال دلوقتى وبكره والسنة الجاية والسنين اللي بعدها، ودي حكمة ربنا في الوجود اللي إحنا فيه، هو التدافع بين الدول والأمم، والأمة اللي تصمد وشعبها بيركز في الأرض ويصبر ويشتغل، ربنا يديله أسباب النجاح، إحنا نحافظ على كل حتة طوب في مصر على كل شجرة على كل زرعة».

وتابع الرئيس: «اوعى تفتكر إن ربنا يعز أبدًا اللي بيهد، بس هيتحاسب امتى؟! الدولة اللي بتهد دولة هتتحاسب امتى، انت فاكر إنه دلوقتي، ممكن بعد 10 سنوات أو 20 سنة، اوعى تخرب انت تعمر وتبني وتصلح بس، والباقي على الله سبحانه وتعالى».