تحدث محمد صلاح نجم منتخب مصر ونادي ليفربول الإنجليزي، عن قصة نجاحه وبداياته في الملاعب الأوروبية، وكيف غير نظرة المجتمع الغربي للاعب العربي، كما تحدث أيضًا عن تفضيلاته في القراءة.

قال "صلاح" خلال لقائه في معرض الشارقة للكتاب: "من وقت ما طلعت من مصر وأنا في دماغي أوصل لمستوى كويس، لما شوفت اللاعيبة في أوروبا بيروحوا قبل التمرين بساعتين وبعدين الجيم وبعدين مساج سألت نفسي ليه بيعملوا كده؟ بدأت اسأل إيه فرق بين الوطن العربي أو مصر وبرا؟ ولما عرفت بيعملوا كده ليه كنت عايز أنجح زيهم، بعد كده قولت عايز أعمل حاجة احسن من اللي بيفكروا فيها عايزهم هما يبصوا على واحد ناجح من الوطن العربي ممكن يبقوا زيه".

أضاف: "لو أي حد نجح نجاح كبير سواء في الرياضة أو مجال تاني هتلاقيه مثقف وعارف كل حاجة تقريبا عن مجاله، لأن كل ما بتتثقف في الحاجة اللي بتعملها كل ما يبقى عندك سهولة إنك تنجح فيها".

كما تحدث صلاح عن طريقة حياته والانتقادات التي يتعرض لها قائلا: "أنا بعيش الحياة بالشكل اللي أنا عايزه مش اللي الناس عايزاه، ومش فارق معايا الناس شايفة إني المفروض أعيش إزاي، في الآخر هي حياتي أنا مش حياتهم هما، أنا بستمتع بكل حاجة بحب أعملها بغض النظر الناس عايزة إيه".

أما عن نصيحته للجمهور بشأن القراءة قال: "اللي أنصح بيه القراءة في علم النفس لأن ده بيساعد بشكل كبير تفهم نفسك وأول ما تفهم نفسك بتفهم الناس وتتعامل مع المواقف بشكل كويس".