ردت شيرين عادل، زوجة الفنان رامي صبري على الهجوم الكبير الذي قام به ويجز على "صبري" بعد تصريحاته الأخيرة في أحد البرامج التليفزيونية.

نشرت شيرين جزءًا من حديث رامي عبر حسابها على موقع تبادل الصور والفيديوهات إنستجرام وكتبت: "ده جزء من الحلقة اللي رامي اتكلم فيها عن الراب.. ومن هنا ورايح مش هسكت وهرد على أي حد يفكر يتكلم عنه تاني بأي طريقة مش عجباني.. أولاً رامي اتسأل سؤال في برنامج ورد وعنده كل الصلاحية لأي رد أو إجابة على أي سؤال يعني مفيش أي مانع يخلي رامي لما يتسأل سؤال ميجاوبش وثانيا رامي صبري ده يا حضرت فنان من أهم الفنانين في الوطن العربي ومن أهم الأصوات ده لو حضرتك مش معانا في مجال المزيكا وبعدين والله يا ريت رامي عنده الوقت بتاع حضرتك الفاضي أوي بتاع ٥ شهور فاضي يا ريت كنا نتمنى".

نرشح لك: بسبب تصريحاته عن "الراب".. ويجز يهاجم مطرب شهير

وتابعت: "أما بقى موضوع رامي رقم كام ده هو الحقيقة مش شاغل بال رامي أوي بس لو حضرتك شايف إن رامي رقم 19 مع الأسف الشديد لازم أقول لحضرتك تبقى أنت مش موجود على الخريطة من الأساس.. أغنية واحدة من رامي صبري واحدة بس تعمل تاريخ لناس، محتاج تذاكر كويس وتعرف انت بتتكلم عن مين، قبل ما تتكلم لأنك واضح إنك عندك شغل تاني غير المزيكا لأنك لو جوة الشغلانة كنت مش هتقول ولا كلمة من الكلام ده علشان الناس متضحكش عليك لأنك اتكلمت عن فنان بجد مش جاي يهزر، وأخيراً لما تحب تعمل دعاية لأغنيتك الجديدة ابعد عن اسم رامي صبري أنا عارفة إن اسمه ممكن يخلي الأغنية ترند بس حاول الأغنية بتاعتك الجديدة تعتمد فيها على نفسك".

وتفاعل عدد كبير من متابعي شيرين على المنشور خاصة وأنها دعمت زوجها بقوة في الموقف الأخير مع ويجز خاصة وأنه لم يتعدى بالقول على أحد ولم يقصد الإساءة إلى أحد.

هاجم مطرب الراب ويجز فنان شهير يدعى "رامي" بسب تصريحاته عن "الراب" ومطربيه، مشيرًا إلى أنه لا يفهم فن "الراب" ولا يفهم كلامه، وبالتالي لا يمكنه أن يقدمه يومًا.

قال "ويجز" خلال فيديو نشره عبر حسابه الرسمي على موقع تبادل الصور والفيديوهات "إنستجرام": "هتكلم عن فنان فاكر إن عنده صلاحية يطلع يتكلم في أي وقت على أي حد والناس تسمع وتسكت".

تابع: "الفنان ده اسمه رامي، وكل ما يقعد 4 أو 5 شهور ويزهق يطلع يتكلم في التلفزيون على بتوع الراب والهيب هوب وكده، هتتكلم امتى عن بتوع البوب اللي أنت منهم وعلى فنك ومجالك".

أوضح أنه يرى أن هذا الفنان لا يفهم "الراب" ولا كلامه كما صرح، لذا لا يمكن أن يقدمه يوما، مشيرا: "ما بتفهمش في الراب ده حاجة ولا بتفهم الكلام بتاعه زي ما أنت قولت فمش هتعرف تعمله".

أشار إلى أنه لا يقدر مثل هؤلاء الفنانين، موضحا: "أنت ما بتقدرش الفنانين دول، وشايف أنهم بيحاولوا يوصلوا للمستوى اللي أنت فيه، في حين أنهم معدينك.. أنت مش رقم اتنين يا رامي أنت رقم 19 وبعيد أوي بجد".