هي أسعار السيارات رايحة على فين وياترى هتفضل تزيد السنة الجاية في 2025 ولا هتنزل وخبراء السوق شايفين انسب وقت للشراء امتي.. خليكم معانا للآخر وهتعرفوا التفاصيل في التقرير  ده

 
طبعا مش محتاجين نشرح لحضراتكم إيه الوضع دلوقتي في سوق السيارات لانه معروف إن الأزمة مستمرة والاسعار ولعت تاني ورجع الأوفر برايس ودا بسبب حظر الاستيراد اللي كان معمول بيه من أغسطس اللي فات لغاية ما قرر البنك المركزي استئناف استيراد السيارات ضمن 13 سلعة استفزازية كان محظور استيرادها لأسباب كانت موجودة وقتها وهي ترشيد الدولار مع خروج الأموال الساخنة وطبعا حظر الاستيراد دا عمل فجوة بين العرض والطلب في السوق والفجوة دي كانت بتزيد للاسف كل يوم ودا سبب ارتفاع أسعار السيارات بشكل قياسي .

طيب دلوقتي ايه الوضع في سوق السيارات ؟
زي ماقلنا لحضراتكم أن السوق بيعاني من حالة نقص كبير في المعروض بسبب ندرة الاستيراد في الفترة اللي فاتت ولسه البنك المركزي موجه تعليمات للبنوك بتدبير العملة لاستئناف الاستيراد ولغاية القرار ما يتنفذ وتكمل دورة الاستيراد واللي مش بتاخد أقل من 3 شهور السوق هيفضل في حالة عطش كبيرة والاسعار هتفضل عالية وممكن تنزل بشكل نسبي لكن هتفضل عالية ومش هتنزل غير لما يحصل زيادة كبيرة ومحسوسة في المعروض  يعني بلغة السوق هيفضل سعر  السيارات عالي وغالي لغاية اخر 2024 وبعدها تبدأ الشحنات تهل على السوق المصري.

طيب إيه مصير اسعار السيارات في 2025؟
زي ما شرحنا لحضراتكم السوق واضح جدا والموضوع كله عرض وطلب وحسب المؤشرات الاقتصادية والتحسن المنتظر في كل جوانب الاقتصاد المصري ودا اللي قالته التقارير  الدولية الأخيرة ومنها تقرير وكالة فيتش للتصنيف الائتماني وصندوق النقد الدولي واللي قالت إن فيه تدفقات دولارية كتير دخلت مصر ولسه هيكون فيه تدفقات اكتر سواء من الاستثمارات أو من الموارد الدولارية الموجودة زي قناة السويس بعد انتهاء الأزمة... ولأن الدولار هو كلمة السر في إستمرار استيراد السيارات فكده نقدر نقول إن سوق السيارات رايح ناحية الاستقرار والعودة لطبيعتها لأسباب كتير  وكلها أسباب منطقية.

عشان نشرح اكتر لحضرتك موزعي السيارات في مصر، شايفين أن  سوق السيارات خلال العام 2025 هيكون في  حالة إيجابية بعد فتح تمويل استيراد السيارات للوكلاء وتوقع الوكلاء أن يؤدي القرار إلى زيادة المعروض من السيارات، وبالتالي القضاء على ظاهرة المستهلك التاجر والأوفر برايس والسوق هيرجع لحالة الاتزان من جديد.

خبراء السوق شايفين بردو إن أسعار السيارات مش هتقفز تاني خلال الفترة الجاية زي ما كان بيحصل لأن السوق كانت بتعاني الفترة الأخيرة من ركود وخاصة مع نهاية فصل الصيف ودخول المدارس لكن الحركة بدأت تعود إلى الانتعاش التدريجي بداية من هذا الشهر، ومن المتوقع استمرارها خلال الفترة المقبلة.
فيه أسباب تانية مهمة هترجع الاستقرار وتنزل الاسعار في سوق السيارات وهي توطين الصناعة في مصر واتساع نشاط تجميع السيارات وعلى سبيل المثال فيه 8 وكلاء للسيارات الصينية هيبدأو في تجميع السيارات والطرازات الجديدة في مصر مع قدوم 2025، وبالتاغ الإنتاج المحلي هيزيد بدخول الشركات الجديدة، ودا هيساهم في خلق منافسة شرسة في أسعار السيارات، وتعدد طرازاتها أمام المستهلك واللي هيستفاد من خفض الأسعار تتيجة العروض بين الشركات دي.