الحكومة حاليا كل شغالها اقتصاد، ومفيش عندهم غير زيادة الصادرات وتقليل الواردات ومعادلة الميزان التجاري لمصر، وحاليا في الدولة دخلت في مفاوضات مكثفة مع 10 شركات لاقامة مشروعات في المنطقة الاقتصادية لقناة السويس.. ياتري اية حكاية الشركات دي.. واية نوع الاستثمارات اللي الشركات دي هتنفذها في المنطقة الاقتصادية.

في توجيهات رئاسية صدرت للحكومة المصرية بتعظيم الصادرات المصرية في كل المجالات وتقليل الواردات ومعادلة الميزان التجاري المصري خصوصا في السنين اللي فاتت كان الميزان مايل بشكل كبير قوي في كفة الواردات علي حساب الصادرات، ومعدل عمل ضغط بشكل مكثف علي العملات الأجنبية في مصر، وبقي في استهلاك عالي جدا لانفاق العملات الأجنبية المختلفة وخصوصا الدولار لتوفير احيتاجات المواطن المصري.
طيب اية اللي عملته مصر علشان توازن الامور بين الاستيراد والتصدير؟.
في الفترة اللي فاتت، الحكومة أخذت اجراءات كتيرة جدا لتحفيز دخول الشركات وروؤس الأموال الأجنبية لمصر، وبناء مشروعات مختلفة في كل المجالات والهدف من المشروعات دي هو توفير الممتجات اللي بيحتاجها السوق المصري وتوفير نسبة كبيرة منها للتصدير بالخارج، ده غير أن الشركات دي هتوفر  ملايين من فرص العمل للمصريين علشان يشتغلوا في بلدهم ويبنوا ويأسسوا انواع وصناعات جديدة كانت مش موجودة في مصر .
وعلشان المنطقة الاقتصادية لقناة السويس تشجع جذب الاستثمارات الجديدة، فهيئة قناة السويس وقعت بروتوكول تعاون مع جهاز التمثيل التجاري ، لجذب الاستثمارات الأجنبية المباشرة فى المنطقة الاقتصادية لقناة السويس.
رجهاز التمثيل التجاري أكده أنه دخل في مفاوضات متقدمة مع 10 شركات من الهند والصين وتركيا والاتحاد الأوروبي، لتنفيذ استثمارات جديدة بالمنطقة الاقتصادية لقناة السويس، وأن الاستثمارات الجديدة هتوصل قيمتها لمليارات الدولارات، وهتشمل مشروعات بمجالات الهيدروجين الأخضر والصناعة.
الجهاز أكد كمان أنه في خلال السنين اللي فاتت جذب أكثر من 50 مشروع استثماري للمنطقة الاقتصادية لقناة السويس، ابرزها في مجالات الطاقة والهيدروجين الأخضر والأمونيا والمنسوجات والملابس والصناعات الهندسية.
الجهاز اتكلم كمان أن شغال حاليا على جذب مشروعات للمنطقة الاقتصادية لقناة السويس في 4 قطاعات رئيسية وهيا الأدوية والسيارات والطاقة المتجددة والصناعات الغذائية، وأن الجهاز شغال حاليا علي خطط الترويج للاستثمار بالمنطقة الاقتصادية لقناة السويس في مختلف الدول، ولكن التركيز كله علي دول الصين والهند وتركيا والاتحاد الأوروبي.
طيب عدد المشروعات اللي اخذت موافقات لبناء مشروعات في المنطقة الاقتصادية لقناة السويس وصل لكام حاليا؟.
الهيئة المنطقة الاقتصادية لقناة السويس قالت أنها اصدرت موافقات نهائية ومبدئية لتنفيذ 218 مشروعًا في المناطق الصناعية والموانئ التابعة لها باستثمارات إجمالية 5.1 مليار دولار، وحصل منهم 98 مشروع على موافقات نهائية بإجمالي استثمارات 2.2 مليار دولار، ده غير أن فيه 120 مشروع  حصل على موافقات مبدئية باستثمارات تصل 2.9 مليار دولار، وده في اطار خطة الحكومة لزيادة الاستثمارات الأجنبية المباشرة اللي بتدخل مصر .